Girls’ Talk - 郁啦! Girls
為了吸引愛美的女生們做運動,現今流行的運動加入了不少新元素,令女生們可以「靚」住收身之餘,亦可以以玩樂形式輕鬆地鍛鍊好身段。 所以《郁啦Girls》的主持們帶著任務,結伴出發搜羅最新又有趣味的流行運動,將運動同女生的距離拉近,跟大家一起「keep fit」,同時亦會帶給觀眾不同的運動小資訊,如消耗之卡路里、不同肌肉之訓練方式、運動器材之運用以及事前之小熱身等,務求令足不出户、不愛運動的女生們找到運動的樂趣。
語言 粵語

第31集 簡易冰壺 (I)

無冰嘅冰壺係咩玩法?其實鬥智鬥力不下於真正冰壺!寶欣、Daisy現身無冰冰壺場,學懂正式冰壺姿勢之餘,仲嚟一場迷你沙壺大戰,邊玩邊學計分方法。

第30集 情侶健身

學識溫馨情侶健身,每日都係情人節!呢集Yoshi 同佢嘅健身教練男朋友,將會親身上陣教大家幾個情侶健身動作,實行一邊深情互望,一邊健身爆汗!仲有家媛夫妻檔挑戰終極難度動作,究竟佢哋做唔做到呢?

第29集 岩盤健身(II)

上集寶欣、Daisy 大玩岩盤健身,熱晒身當然要分個高低!今次出動埋反應燈縛喺身,2位主持要喺對方身上「攞分」!大鬥反應同耐熱能力,究竟邊個可以笑到最後,逃離「大懲罰」?

第28集 岩盤健身 (I)

時下興crossover 集兩家所長,而健身 crossover 岩盤浴正正幫到你修身減肥,事半功倍!寶欣同Daisy今次就去到高溫岩盤浴房間,一邊爆汗一邊做運動!佢哋仲會介紹幾款健身小幫手俾大家添!

第27集 VX球 (II)

大家睇咗上集都知VX球講求眼明手快加上手腳協調力要好足夠。喺壁球場呢個咁細嘅空間要攻擊同時防守,仲要留意自己會唔會走步,被對手打中識唔識舉手認失分,咁多嘢要同一時間做,Yoshi 同Vivian 真係搞得掂?

第26集 VX球 (I)

今次Yoshi同Vivian帶大家去了解一項被人譽為「紳士運動」嘅運動。雖然話係「紳士」,不過都照樣啱Ladies同Girls玩嘅,因為呢項運動巧智慧之餘,仲巧埋你失分要講出聲嘅嗰種誠實呀。講咗咁耐,呢項運動唔係叫「紳士球」,而係叫VX球﹗

第25集 圓網球 (II)

見到上集Yoshi同Vivian玩圓網球,除咗學識基本功,即係開波,傳球同殺波之外,到真正嘅圓網球比賽就唔會係咁簡單。今次二打二,靠兩隊身手、準繩、隊員間合作同默契,唔知上集俾人睇死嘅Yoshi喺今次Battle入面絕唔絕地反擊到呢?

第24集 圓網球 (I)

有人話鍾意打排球又鍾意打乒乓球,不過冇時間玩晒兩樣運動,咁就掂嘞﹗今次Yoshi同Vivian帶大家去玩一樣新運動,揉合咗排球同乒乓球嘅玩法,呢項運動就係圓網球﹗到底圓網球點樣將排球同乒乓球嘅步法、身法、揮擊、視力,反應等等融入其中呢?

第23集 十四日瘦大腿提臀Challenge

啱啱過咗聖誕節,各位放完個假食完好嘢係咪覺得要做吓運動減輕吓心中嘅內疚同罪惡感呢?娟姐同寶欣喺呢兩個禮拜就接受咗 「十四日瘦大腿提臀Challenge」,喺呢兩個禮拜入面每日做幾組動作,睇吓最後邊個瘦得多啲。

第22集 躲避盤 (II)

上集同大家講咗唔會撞面爆頭嘅運動躲避盤入面應該點發盤同接盤,上集娟姐同Asha就教得有紋有路吖,今集就要見真章,睇睇娟姐隊大戰Asha隊結果到底會係點,今集娟姐有驚人表現,簡直係出人意表。有幾驚人?咁就要睇吓啦。

第21集 躲避盤 (I)

唔知大家細細個玩飛碟或者大個玩閃避球有冇試過俾人轟中個頭,今次Girls’ Talk –郁啦Girls就由娟姐同Asha帶大家去體驗一吓人畜無害,唔會撞面爆頭嘅運動 – 躲避盤。

第20集 氣槍射擊 (II)

上集就見到Kanya 同阿Gi由唔識揸槍,搵唔到光學瞄準個紅點,到後來識揸槍同射中靶。不過今次Battle唔同上一集定點練射擊,今次要跟足氣槍射擊比賽規則,跟住路線射一系列嘅靶,鬥準之餘仲要鬥快,邊個可成為Girls’ Talk槍后呢?

第19集 氣槍射擊 (I)

「其實人生,並沒有太多的時間,給我們去斟酌和剖析。應該出手的時刻就要毫不猶豫的出手」見到呢句都知道今次嘅運動係同「槍」有關,不過呢次唔係實彈射擊,而係氣槍射擊。

第18集 攻防箭 (II)

今次又唔同上一集只係射靶咁簡單,今次Battle嚟真玩攻防箭,兩隊人除咗要鬥快射中對面嘅靶之外,仲要用弓箭射中對方,令對手出場,到底係個人技術定係團體合作會令佢哋贏呢?

第17集 攻防箭 (I)

今次唔係叫Girls’ Talk 主持去浪跡江湖,而係去玩「攻防箭」。「箭」呢樣嘢好似要經過長時間訓練先駕馭到,好在班Girls資質高兼骨骼精奇,加上攻防箭支弓同箭都經過特別設計,可以令新手極速上手。

第16集 極限忍者運動 (II)

經過上一集講求協調性,手握力同平衡力,仲好需要背肌、腕力、腰腹,大腿肌肉同二頭肌力量嘅極限忍者運動洗禮之後,相信Vivian同可盈做到高級忍者嘅機會都近乎零。

第15集 極限忍者運動 (I)

今次Girls’ Talk 郁啦Girls去玩嘅運動竟然同日本古代其中一份特殊職業有關?做呢份特殊職業嘅人要飛簷走壁,少啲手力腰力腿力意志力都做唔嚟。冇錯嘞﹗

第14集 Bamboo Yoga (II)

上集Vivian同可盈玩竹棚瑜伽,喺海邊試咗空中吊床同空中吊環。今次就要Battle嘞,教練Carmen設計咗三組中級瑜伽動作俾佢哋。佢兩個上集雖然冇跌落地但上吊床同吊環都要靠教練先上到,今次Battle會唔會歷史性地三組動作都fail呢?

第13集 Bamboo Yoga (I)

瑜伽大家見得多,不過有種玩法你可能未見過。呢項運動上年先俾人研發出嚟。唔用鋼架,而係用正宗香港本土搭棚嗰種竹做大支架;場地唔係常見嘅室內冷氣房,而係喺沙灘邊﹗做瑜伽本身就係接觸大自然,修身養心。

第12集 Rebound Shoes (II)

上集Girls’ Talk - 郁啦Girls大家都見到娟姐同Kanya跳咗分半鐘都冇就喘晒大氣,相信都感受到Rebound Shoes嘅威力。經過苦練,今集終於有個大Battle。

第11集 彈體健身

彈體健身(Rebounding)係近年喺香港興起嘅運動,不過俾人嘅感覺就係好受場地限制。今次Girls’ Talk - 郁啦Girls帶大家去見識一種新玩法。有樣新裝備令到彈體健身唔再受場地所限,喺大街都可以做到呢樣運動。

第10集 麻瓜魁地奇 (II)

今次同大家講吓香港麻瓜魁地奇嘅發展之後,娟姐同Kanya就會分成兩隊進行麻瓜魁地奇Battle﹗到底係成日俾對方Beater打中嘅娟姐會贏,定係手長腳長嘅Kanya會贏呢?

第9集 麻瓜魁地奇 (I)

去去武器走﹗唔知呢句有冇勾起大家對魔法嘅熱誠呢?曾幾何時,都想成為偉大嘅魔術師嘅你,機會嚟啦﹗Girls’ Talk - 郁啦Girls今次帶大家參加麻瓜魁地奇﹗麻瓜魁地奇同小說入面嘅有咩唔同?

第8集 音樂燈光GYM (II)

今集Crystal同阿Gi就要嚟個大Battle嘞。到底會係「深蹲小天后」Crystal有優勢啲?定係比較嬌小但對自己手瓜好有自信嘅阿Gi出色啲呢?今次又係邊個估輸Battle要接受大懲罰呢?

第7集 音樂燈光GYM (I)

咁多位去健身房健身嘅時候,會唔會覺得做器械重重複複,悶到非常?宜家,健身的人有福了。早排西班牙開發咗個系統,透過音樂,燈光同輔助器材,將娛樂融入健身。

第6集 Wakesurfing (II)

上集Crystal同阿Gi就示範咗玩Wakesurfing點樣上板,企定,滑返去船尾浪同放繩。不過最好睇都好似係跌落水嗰下。今次佢兩個就要Battle嘞,聽講Battle內容超難,兩位主持會唔會連第一關都過唔到呢?

第5集 Wakesurfing (I)

Wakeboard同Surfing大家就聽得多,今次Crystal同阿Gi就帶大家去體驗一下Wakesurfing聽講難度比Wakeboard仲要高,高喺邊啲位呢?

第4集 美人魚 (II)

上集自稱「美人余」嘅Yoshi同寶欣學做美人魚學到爭啲遇溺咁,今集就要Battle嘞,唔知兩位做唔做到教練俾嘅三套動作呢?兩集前「錯信」Yoshi嘅Renee又會唔會再犯同一個錯呢?睇吓兩位可唔可以做到真正嘅美人魚啦﹗

第3集 美人魚 (I)

唔知大家有冇聽過一個傳說:水手出海唔係驚大風大浪,更加唔係驚撞到海怪利維坦或者幽靈船長Davy Jones,而係見到一種美若天仙嘅生物浮上水引誘你,氹你落水再吸晒你啲血﹗冇錯嘞就係講緊美人魚。

第2集 直立板瑜珈 (II)

上集大家就見住兩位Girls玩直立板瑜珈,佢哋由起唔到身到勉強都叫做企得穩兼做到啲簡單動作。今次兩位Girls嚟個大Battle,挑戰三組動作,你又覺得邊個會贏呢?

第1集 直立板瑜珈 (I)

呢個summer又想同太陽玩遊戲但又想玩瑜珈?冇嘢架,魚與熊掌真係可以兼得架。今次兩位Girls就帶大家去沙灘玩直立板瑜珈,覺得自己做瑜珈招式冇難度嘅話,真係可以喺海面上試試喎。