晚吹 - 又要威 又要戴頭盔
每集同路人以四人為限,各自戴上真‧頭盔,跟主持人林二汶和余迪偉再遊花園、一同就INSIDER SECRETS進行討論。同路人同聲同氣同仇敵愾,盡訴INSIDER在頭盔掩下難得公開的秘密。
主演
,
語言 粵語

第189集 波鞋售貨員 (I)

波鞋售貨員親身認證,原來呢行好多古惑術語,無論係關於波鞋碼數、衰客行為、身體部位、客人外表、價錢嘅都有,聽到外行人一頭霧水。

第188集 美甲師

好多嘢都係由低做起,美甲師都一樣!初入行做學徒月入得$4000,竟然被無良老闆呃錢呃足$8000!修甲聽聽埋埋唔少八卦事,有美甲師竟然發現三角戀三位主角都係自己客人,最後點收科?

第187集 學生記者

一班原本主力採訪校政嘅學生記者,因為時局嘅轉變同需要,毅然踏上前線衝鋒陷陣。呢班初出茅廬嘅學生記者上到前線採訪,到底遇到乜嘢困難同制肘?

第186集 驅魔人 (II)

驅魔人能人所不能,但面對唔同嘅鬼魂,有時都幾頭痕。當宿主唔想同鬼魂分離,驅魔人可以點處理? 遇上一隻法力高強嘅惡鬼尋仇,作為血肉之軀嘅驅魔人到底可以點樣全身而退? 如果聽唔明隻鬼噏乜,又有咩新奇法寶可以應對?

第185集 驅魔人 (I)

「驅魔人」喺電影同電視劇就見得多,但現實中真正嘅驅魔又係咩一回事? 天生有陰陽眼就做到驅魔人? 夾中指、灑童子尿、講粗口甚至出動埋十字架,邊個方法真係驅到鬼,邊個方法只係做戲咁做俾你睇?

第184集 友台PA (II)

成日話娛樂圈係一個大染缸,而作為呢個大染缸嘅一份子,電視台PA可以話見盡人情冷暖。原來呢一行,老臣子唔一定擺架子,反而同老前輩合作仲舒服!咁究竟最難頂係啲咩演員?PA們最無辜被罵嘅經歷又係點?今集《又要威又要戴頭盔》講盡PA血淚史!

第183集 友台PA (I)

每個電視節目背後,都有一班幕後功臣!而喺呢班「功臣」當中,最辛酸莫過於助導(PA)喇!究竟PA平時做啲乜?試過一個月工時超過400小時,呢班人係點樣捱過?仲有平時節目見到嘅嘔吐物、血漿等等,到底係點樣整出嚟?

第182集 已婚同志 (II)

一班同志婚後喺香港用配偶身分生活,表面上係平凡簡單,實際上每個細節都考起大家:平日兩個星期搞掂嘅家屬證,因為係同志身分搞三年都搞唔到,仲要俾HR寸「不如你結多次婚」;明明係行哂禮簽哂紙,報稅剔邊格竟然靠司法覆核;到底叫老婆定老公?

第181集 已婚同志 (I)

注意!本集含有大量閃光彈!當結婚嘅意義淪為只係一紙婚書時,香港一班同志就係為咗呢一張婚書,飛到世界各地結成佳偶。今集我哋就請咗幾位已婚嘅同志上嚟,講下佢哋嘅求婚故事到籌備婚禮過程。

第180集 配音員 (II)

一班專業配音員坐埋一檯,火力全開大講幕後種種奇怪要求同禁忌:震音演繹廣告VO、唔可以講射波嘅足球動畫、唔可以打交嘅武鬥場面…同時又會講下做專業配音員周不時蝕車錢嘅場面、為咗保住靚聲食藥食壞身子、咳到半條人命仲要頂硬上嘅慘況。

第179集 配音員 (I)

有冇諗過晚晚追劇見到嘅Oppa,有一日會同你同一架van仔仲大叫有落?動畫之中擁有噴火身材嘅女優,原來同時都可以係文青女神?靠把聲搵食嘅,除咗兩位主持,仲有香港專業聲優!

第178集 貓狗義工 (II)

成日話「支持領養,拒絕購買」,但究竟點先可以領養寵物?貓狗義工嚟家訪,原來會睇好多嘢!成日聽人講「愛記」、「漁記」濫殺生命,究竟貓狗義工同佢哋關係又係點?仲有義工嘅親身經歷,搞到一個大男人流下男兒淚!

第177集 貓狗義工 (I)

好多貓狗義工出錢出力幫浪浪,以為「拯救生命」咁偉大,一定備受尊重,點知原來有苦自己知!遇到街坊阻撓,義工們有咩方法幫自己解圍?貨倉搬遷留低幾隻倉狗,女義工不惜以身犯險救狗,究竟可唔可以大團圓結局?留意今集《又要威又要戴頭盔》啦!